Yfirlýsing frá UNICEF, Barnahjálp Sameinuðu þjóðanna, 7. apríl 2026.

 „Börn í Íran og víðar í heimshlutanum verða fyrir líkamlegu tjóni og andlegu álagi, samhliða árásum og vaxandi ógn við þá grundvallarinnviði sem afkoma þeirra byggist á.

„Víða um Íran bera börn nú þegar þungann af átökunum. Samverkandi áhrif stöðugra árása, óstöðugleika og truflana á nauðsynlegri þjónustu hafa áhrif á öryggi þeirra til skamms tíma sem og heilsu, þroska og velferð til lengri tíma. Börn hafa látið lífið, slasast og neyðst til að flýja heimili sín og lifa við stöðugan ótta og óvissu. Skólar, heimili og samfélög, sem ættu að veita öryggi og stöðugleika, verða fyrir áhrifum.

„Sjúkrahús og heilbrigðisþjónusta eru undir vaxandi álagi, þar sem truflanir hafa áhrif á lífsnauðsynlegar meðferðir. Skemmdir á 442 heilbrigðisstofnunum víðs vegar um landið skerða aðgengi að brýnni heilbrigðisþjónustu fyrir 10 milljónir manna, þar af 2,2 milljónir barna, samkvæmt heilbrigðisráðuneyti Írans og Rauða hálfmánasamtökunum í Íran (IRCS).

„Pasteur-stofnunin hefur orðið fyrir verulegu tjóni. Hún hefur um áratugaskeið verið helsta miðstöð bóluefnaframleiðslu landsins, en skemmdirnar hafa stöðvað framleiðsluna og setja börn í hættu á að missa aðgang að lífsnauðsynlegum bóluefnum. Jafnframt hefur algjör eyðilegging Tofigh Darou, sem er lykilframleiðandi lyfja við flóknum og langvinnum sjúkdómum, þar á meðal krabbameini, valdið alvarlegum skorti á lífsnauðsynlegum meðferðum og sett sjúklinga, þar á meðal börn, í bráða hættu.

„Yfir 760 skólar hafa að sögn verið eyðilagðir eða skemmdir, og hafa margir nemendur látist eða slasast. Þar á meðal er mannskæð eldflaugaárás á Shajareh Tayyebeh-skólann í Íran á fyrsta degi stríðsins, þar sem 168 stúlkur og drengir létust.

„Börn um allt svæðið líða fyrir þessi átök. Árásir í mörgum löndum valda dauða og eyðileggja mannvirki og innviði sem börn treysta á – þar á meðal sjúkrahús, skóla og vatns- og fráveitukerfi. Börn hafa einnig látið lífið eða slasast í Barein, Ísrael, Jórdaníu, Kúveit og Líbanon.

„Alþjóðleg mannúðarlög banna með skýrum hætti árásir á borgaralega innviði sem eru nauðsynlegir til að tryggja lífsafkomu barna. Skemmdir á vatns- og hreinlætiskerfum myndu auka verulega hættu á sjúkdómum meðal barna, rafmagnsleysi myndi hafa frekari áhrif á lífsnauðsynlega þjónustu, þar á meðal þjónustu við nýbura og viðkvæma hópa barna, og mistök tengd kjarnorkumannvirkjum gætu haft óafturkræfar afleiðingar fyrir komandi kynslóðir.

„UNICEF ítrekar ákall sitt um tafarlaust vopnahlé á svæðinu og að dregið verði úr spennu og stigmögnun með raunverulegum hætti. Allir aðilar verða að sýna ítrustu stillingu og uppfylla skuldbindingar sínar samkvæmt alþjóðlegum mannúðarlögum. Vernda verður borgaralega innviði og tryggja öryggi barna ávallt.

„Kostnaður frekari stigmögnunar verður að lokum mældur í lífum og framtíð barna sem eiga skilið vernd, reisn og von, en ekki sífellt þyngri afleiðingar átaka sem þau völdu sér ekki.“