Hér að neðan má lesa yfirlýsingu Catherine Russell, framkvæmdastjóra UNICEF, Barnahjálpar Sameinuðu þjóðanna, um vopnahléið á Gaza:

„UNICEF fagnar því að samið hefur verið um vopnahlé á Gaza-svæðinu, sem veitir von fyrir börn í Palestínu sem hafa þurft að þola hryllilegan stríðsrekstur síðustu tvö ár.

UNICEF er tilbúið með yfir 1.300 flutningabíla sem innihalda tjöld, næringu, nauðsynleg lyf og bóluefni, námsefni, vatns- og hreinlætisbúnað. Við höfum starfsfólk og samstarfsaðila á vettvangi sem vinna að því að bæta líf barna. Allir aðilar verða að tryggja að mannúðaraðgerðir Sameinuðu þjóðanna geti hafist tafarlaust á öruggan hátt og á þeim skala sem þarf.

Það er brýnt að aðilar virði skilmála samkomulagsins, tryggi að vopnahléið sé virt,  að það sé varanlegt og leiði til langvarandi friðar, og að öllum gíslum á svæðinu verði sleppt á öruggan og virðulegan hátt.

Tveggja ára loftárásir og átök hafa valdið gífurlegri eyðileggingu á Gaza-svæðinu. Meira en 64.000 börn hafa verið drepin eða særð, og heimili, sjúkrahús og skólar hafa verið lögð í rúst. Nauðsynleg þjónusta hefur hrunið og umfang mannúðaraðstoðar sem þarf er gríðarlegt.

Hungursneyð hefur verið lýst yfir á hluta Gaza-svæðisins og öll börn undir fimm ára aldri eru í hættu vegna alvarlegrar vannæringar. Það eru samtals 320.000 börn. Meira en 56.000 börn hafa misst annað eða bæði foreldra sína. Öll börn hafa upplifað áföll og veruleg truflun hefur orðið á menntun þeirra.

Vopnahléið verður að tryggja mannúðarsamtökum tækifæri til að veita þá umfangsmiklu neyðaraðstoð sem svo sárlega þarf á Gaza á öruggan hátt. Þetta felur í sér óhindraðan aðgang að öllum börnum og fjölskyldum með mat og næringu, heilbrigðisþjónustu, vernd og sálfélagslegan stuðning, hreint vatn og hreinlætisaðstöðu, menntun, sem og fjárhagsaðstoð og flutning á vörum til verslunar.

Allar landamærastöðvar inn á Gaza, þar á meðal í norðurhlutanum, þurfa að opnast tafarlaust til að tryggja flæði mannúðaraðstoðar, nauðsynjavara og neyðarbirgða. Veturinn er á næsta leiti og tíminn er naumur þar sem þarf að tryggja að börn og fjölskyldur hafi aðgang að nauðsynlegum birgðum til að takast á við vetrarveður og kulda.

UNICEF hvetur aðila eindregið til að nýta þetta samkomulag sem tækifæri til að móta varanlega pólitíska lausn sem tryggir réttindi og velferð allra barna í Palestínu og Ísrael.

Stríðið hefur þegar kostað börnin á Gaza svo mikið. Þau eiga nú skilið varanlegan frið svo hægt sé að hefja bataferlið."