Fulltrúar Ungmennaráðs UNICEF á Íslandi tóku þátt í ráðstefnu Barna- og unglingageðdeildar Landspítalans (BUGL) sem fram fór í Salnum í Kópavogi síðastliðinn föstudag. Um er að ræða árlegan viðburð sem hefur það að markmiði að efla samvinnu milli aðila í heilbrigðis-, félags- og menntakerfinu sem sinna þjónustu við börn og unglinga með geðraskanir. Yfirskrift ráðstefnunnar í ár var Hvað er barni fyrir bestu? og var sjónum beint sérstaklega að þjónustu við trans börn og ungmenni.

Á ráðstefnunni flutti Brynjar Bragi Einarsson, formaður Ungmennaráðs UNICEF á Íslandi, erindi þar sem hann talaði um réttindi barna út frá Barnasáttmála Sameinuðu þjóðanna. Vísaði Brynjar Bragi sérstaklega í 2.gr. (Öll börn eru jöfn) 6.gr. (Réttur til lífs og þroska) og 3.gr. (Það sem er barninu fyrir bestu).

Snæ Humadóttir, fulltrúi Ungmennaráðs UNICEF á Íslandi, fór svo í fyrirspurnir á sviði ásamt öðrum fyrirlesurum og sérfræðingum og svaraði spurningum úr sal varðandi vinnu Ungmennaráðsins. Þar talaði hún m.a. um hvernig Ungmennaráðið ynni að réttindum barna með fræðslu, greinarskrifum og með því að veita stjórnvöldum aðhald varðandi hin ýmsu málefni.