Nýir talsmenn barna á Alþingi tóku þátt í skemmtilegum viðburði í Alþingishúsinu í dag, skipulögðum af Barnaréttindavaktinni. Þetta er í sjöunda skipti sem talsmenn barna á Alþingi eru skipaðir, og koma fulltrúar úr öllum flokkum sem eiga sæti á þingi.
Á viðburðinum settu þingmennirnir sér markmið fyrir kjörtímabilið í tengslum við réttindi barna og fengu það verkefni að föndra fígúru sem minnir þau á að gæta að hagsmunum og málefnum barna á Alþingi og minna sig á að öll börn skipta máli. Þar er átt við öll börn í alls konar aðstæðum sem mörg eiga sér ekki málsvara, en Barnasáttmáli Sameinuðu þjóðanna nær til allra barna óháð uppruna og lagalegri stöðu.
Barnasáttmáli Sameinuðu þjóðanna var lögfestur á Alþingi í febrúar árið 2013. Þar sem engin þingnefnd á Alþingi hefur enn haft það hlutverk að fjalla heildstætt um málefni barna var óskað eftir samstarfi við þingflokka og stofna þingmannahóp um talsmenn barna á Alþingi. Árið 2014 skrifuðu þingmenn í fyrsta sinn undir yfirlýsingu og tóku að sér að huga sérstaklega að réttindum, hagsmunum og sjónarmiðum barna í störfum sínum.
Að Barnaréttindavaktinni standa níu samtök sem láta sig varða réttindi og velferð barna. Ásamt UNICEF á Íslandi eru það samtökin Barnaheill, Heimili og skóli, Mannréttindaskrifstofa Íslands, Rauði krossinn, Samfés, UMFÍ, Þroskahjálp og ÖBÍ réttindasamtök.
Nýjir talsmenn barna á Alþingi eru:
Jón Gnarr, þingmaður Viðreisnar / María Rut Kristinsdóttir til vara.
Kolbrún Baldursdóttir, þingmaður Flokks fólksins / Guðmundur Ingi Kristinsson til vara.
Jón Pétur Zimsen, þingmaður Sjálfstæðisflokksins / Bryndís Haraldsdóttir til vara.
Halla Hrund Logadóttir, þingmaður Framsóknarflokks / Þórarinn Ingi Pétursson til vara.
Ingibjörg Davíðsdóttir, þingmaður Miðflokksins / Nanna Margrét Gunnlaugsdóttir til vara.
Guðmundur Ari Sigurjónsson, þingmaður Samfylkingarinnar / Eydís Ásbjörnsdóttir til vara.
