Bráðavannæring barna undir fimm ára aldri jókst um 34% milli ára á landssvæðum á valdi stjórnvalda Jemen og er næringarástandið orðið sérstaklega alvarlegt á vesturströnd landsins. Þetta er meðal þess sem kemur fram í nýrri tilkynningu frá samráðshópi IPC (e. Integrated Food Security Phase Classification) sem samanstendur af stofnunum Sameinuðu þjóðanna, frjálsum félagasamtökum og stjórnvöldum í Jemen.
Samkvæmt greiningu IPC glímdu rúmlega 600 þúsund börn undir fimm ára aldri við bráðavannæringu á tímabilinu og þar af voru 120 þúsund alvarlega vannærð. Þá bendir hópurinn á að það sem af er árinu 2024 hafi ríflega 220 þúsund óléttar konur og konur með barn á brjósti glímt við bráðavannæringu.
Ástæður þessarar miklu aukningar má meðal annars rekja til útbreiðslu sjúkdóma á borð við kóleru og mislinga, fæðuóöryggis, takmarkaðs aðgengis að öruggu drykkjarvatni og efnahagsþrenginga í landinu.
Íbúar Jemen hefur um árabil verið þjakað af langvarandi átökum og efnahagskreppu sem gera það að verkum að þar er eitt hæsta hlutfall vannæringar í heimi.
Fulltrúar IPC lýsa í tilkynningu með niðurstöðum úttektarinnar yfir miklum áhyggjum á ástandinu og afleiðingum þess á börn og íbúa Jemen. Pierre Honnorat, fulltrúi Matvælaáætlunar Sameinuðu þjóðanna í Jemen, segir að þær ættu að vekja heimsbyggðina til umhugsunar og aðgerða um að hér séu líf milljóna íbúa í húfi.
Kallað er tafarlausum og viðvarandi alþjóðlegum stuðningi til að takast á við rót vandans og styrkja innviði í landinu svo komast megi fyrir vandann nú þegar og til lengri tíma. Á sama tíma sé algjörlega nauðsynlegt að binda enda á nær áratugarlöng átök í ríkinu og koma á frið.